Exo 19 | MEU | STEP | Hua ihatoina ai, Israel na Aigupto amo e raka lasi murinai, dinana heḡereḡerena ai, idia na Sinai tano ḡaḡaena ai e kau.

Exodus 19

Israel na Sinai ai

1 Hua ihatoina ai, Israel na Aigupto amo e raka lasi murinai, dinana heḡereḡerena ai, idia na Sinai tano ḡaḡaena ai e kau. 2 Refidim e rakatania negana ai, idia na Sinai tano ḡaḡaena ai e kau: bena tano ḡaḡaena ai e taruha, ororo badi-tanona ai. Unuseni ai Israel e taruha.

3 Bena Mose e dara dae Dirava dekenai. Iehova gadona na ororo amo ema ia enai, eto, Iakob ena bese taudia ini ba hereva henidia toma, Israel taudia ini ba hamaorodia toma. Baoto 4 “Aigupto taudia ede na karadia toma vada o itaia, dibamui danu ede na abimui toma, ugava hanidia latadiai na heto, bena na hakaumui mai dekegu ai. 5 Harihari lau eregu boma kamonai bona egu taravatu boma badinaia, umui na egu bese korokori ai boma lao, bese iboudiai bogaragidiai, badina be tanobada idoinai be lauegu. 6 Egu hahelaḡa taudia ai baola; bese helaḡana ai baola”. Israel taudia unu ba hamaorodia toma.

7 Bena Mose na ema, Israel tau-badadia e boiridia, Iehova ena haheḡani herevadia iboudiai e hamaorolaidia. 8 Bena taunimanima iboudiai e haere hebou, eto, Iehova ena hereva heḡereḡerena ai baia karaia. Bena Mose ese taunimanima edia haere na Iehova e hamaorolaia. 9 Bena Iehova ese Mose e hamaoroa, eto, A itaia, lau na ori badana ai baina vasi, bena baina hamaorolaimu herevadia na taunimanima bae kamonai; bena bae abidadama henimu ela hanaihanai. Bena Mose ese taunimanima edia hereva na Iehova e hamaorolaia.

10 Bena Iehova ese Mose e hamaoroa, eto, Taunimanima dekedia baola; hari dina ai bona kerukeru ba hahelaḡadia; edia dabua danu bae huri; 11 dina ihatoina ai bae heḡaeḡae; badina be dina ihatoina ai Iehova baine diho Sinai ororona ai, taunimania iboudiai vairadiai. 12 Hetoa danu bavabia, ororo baine ḡeḡea ahu, bena ba hamaorodia, baoto “Nahuamui ba toho, ororo ai basio dae kau, bona badibadina basiola; daika na ororo ai baine dae kau, vada bae alaia mase; 13 imadia amo basie daua toho, a nadi amo bae hodoa mase eiava diba amo bae tarakia mase; bema taunimanima eiava ubu-ubu ḡauna, to basine mauri. A kibi reḡena daudauna bae kamonai, bena ororo ai bae dara dae”. 14 Taunabunai Mose na ororo amo e hekei, taunimanima dekediai; bena e hahelaḡadia, edia dabua danu e huri. 15 Bena ia ese e haduadia, eto, Ba heḡaeḡae ela bona dina ihatoina; hahine ta basio raka henia kahi.

16 Dina ihatoina ai, daba kahana ai, guba e rahua bona kevaru e kevaru isi, bona badana ta ororo dorina ai e kau. Bena kibi ta reḡena e kamonai, reḡena na bada herea: taruha taudia iboudiai na kudoudia e hetaha. 17 Bena Mose ese taunimanima na edia taruha amo e hakaudia lasi, Dirava vairanai bae gini; idia na e raka ela bona ororo badi-tanona ai. 18 Una negana ai Sinai ororona na kwalahu ese e ḡovaia ahu, badina be Iehova na lahi ai e diho, ororo latani. Taunabunai, kwalahuna e dae badabada, amu kwalahuna na heto; ororo tanona idoinai danu e laga. 19 Kibi reḡena na e bada e laova; bena Mose na e hereva, bona Dirava ese guba rahurahu lalona amo e haere henia. 20 Bena Iehova vada e diho, Sinai ororona dorina ai. Iehova ese danu Mose e boiria, baine dara dae ororo dorina ai, bena Mose na e dara dae. 21 Bena Iehova ese Mose e haduaia, eto, A hekei, taunimanima ba hadibadia, Iehova itana totona bae didi dara bena hutuma bae mase na garina. 22 Hahelaḡa taudia ese danu Iehova do basie raka henia kahi; sibodia bae hahelaḡa guna, Iehova ese ediai baine hedinarai taku na garina. 23 Bena Mose ese Iehova e haere henia, eto, Taunimanima na ororo ai basie dara dae diba, badina be oi ese o haduamai, hetoa baia abia, ororo baine ḡeḡea ahu, baia hahelaḡaia oto. 24 Iehova ma eto, A hekei, bena Aaron ida ma ba dara dae; a hahelaḡa taudia bona taunimanima kavakavadia na basie didi dara Iehova enai, ia ese idia ediai baine hedinarai taku na garina. 25 Taunabunai Mose e hekei taunimanima dekediai, unu hereva e hamaorolaidia.